ياحول قيصدة الشاعر عند مرضه واقتراب منيته

بسم الله الرحمن الرحيم
السلام عليكم ورحمة الله وبركاته

هذي القصيده لمرشد البذالي رحمه الله
عندما مرض وأحس بقرب منيته قال هذه القصبده :-

ياحول أظن الحـق جتنـي طروشـه
جتني مناديبـه وأنـا عنـه منحـاش
اليوم كـن بداخـل الجـوف هوشـه
مثل إختراش الزلم في داخل الجـاش
يالله عسى عفـوك ولطفـك نحوشـه
ويالله بحسن الخاتمه عنـد الاقـراش
ودنياك لـو تعطيـك حلـو المعوشـه
تالي سوالفهـا تعـود علـى مـاش
يا ما خذينـا فـاول العمـر شوشـه
وياما مشينا مـع مظاهيـر وأدبـاش
فـي خايـعٍ وبـل الثريـا رشوشـه
نجنا الزبيدي في صحاصيح ودشـاش
وياما جلسنـا مـع مـرودع نقوشـه
في سهلـة مـا حدرنـا زل وفـراش
في وسط روض مخضـرات خفوشـه
نبته جديـد ومبعديـن عـن الطـاش
نبنـوب لا طفـلـه ولا بمخـروشـه
عنق الفريـد مذيـره زول حشـاش
قامـت تخاطبنـي بنفـس هشوشـه
بس الكلام وعرضها أبيض من الشاش
لاشك من طـول الغيـاب محشوشـه
تونس معاليقه مـن الهجـر عطـاش
أسرار في وسط القلـوب مخشوشـه
بين الثنيـن ولادرى عنهـا الـواش
ربعـة وفـاء ولا السلـب ماننوشـه
ماني لوجـه معـذب الحـب خمـاش
واليوم مالي مع هـل الصيـد نوشـه
عطيتها غيـري بـلا سـوم ببـلاش
عند الطبيب وصار عنـدي وحوشـه
ومن الاقامه صابنـي هـم وخـراش
هالحين شفني قاعـد عقـب دوشـه
اصلب اعضاي وكن بالجسم هشهاش
خليـت ديوانـي ومجـلاس حوشـه
واليوم شفني ساكـن بـدار الانعـاش
والنفس ضاقت عقب ماهي بشوشـه
مثل المقيم اللي علـى نـو مطـراش
امطـرفٍ بالبـاب قـشـه ونـوشـه
ينطر خويـه بيـن هجـده ومغبـاش
وسلامتكم ........
دمتم بحفظ الله ورعايته .